Tann 21. juli fara vit úr okkara núverandi hølum á Kopargøtu 1, har vit hava hildið til í mong góð ár. Tað verður við sorgblídni, men eisini við gleði fyri tí, sum nú er fyri framman.
Frá mánadegnum 21. juli til fríggjadagin 1. august er stongt vegna summarfrí.
Vit lata upp 4. august í okkara nýggju hølum á Óðinshædd 11.
Vit vera at finna á 3. hædd á Óðinsbrú.
Vit gleða okkum framhaldandi at veita tykkum eina góða tænastu í nýggjum og tíðarhóskandi umstøðum.
52 fólk vóru við í kappingini, og inn komu oman fyri hundrað uppskot. Norrøn gudalæra og serliga Óðin var afturvendandi tema millum mongu uppskotini.
– Vit eru ovfarin av stóra áhuganum og vilja takka øllum, sum hava tikið sær stundir at sent okkum síni uppskot, sigur Angela Lindenskov á Bøgarði, sum er marknaðarsamskipari í LÍV.
Navnið
Hóast mong uppskot um navn vóru góð, var tó einki, sum var nóg neyvt. Dómararnir høvdu heimild til at velja úr rúgvuni, sum teimum lysti – men teir høvdu eisini heimild til einki at velja. Tó fingu teir íblástur frá øllum teimum góðu uppskotunum, og úr hesum spratt eitt nýtt navn.
– Navnið er Óðinsbrú, og tað samspælir væl við staðsetingina. Brú er sjálvandi fornur formur av brúgv, og bygningurin stendur høgur á heygginum, har ið hann minnir eitt sindur um eina brúgv á einum skipi. Mann kann ímynda sær, at Óðin stendur á brúnni og skoðar yvir Nólsoyarfjørð, sigur Angela.
Búmerkið
Hóast einki navn varð valt millum øll uppskotini, so var støðan øðrvísi í búmerkjakappingini. Millum øll tey snøggu uppskotini til nýggja búmerkið var tað eitt, sum beinanvegin skaraði framúr. Í sínum rámandi einfeldni var búmerkið nútímans, meðan klassiska litsamansetingin gav tí ein tignardám.
– Sum sæst á myndini, hellir strikan uppi yvir O’num ikki, men er vatnrøtt. Hetta brýtur ortografisku reglurnar, men letur samstundis upp fyri nýggjum tulkingum. Meðan ein strika á skák umboðar spenning, umboðar ein vatnrøtt strika javnvág, neyvleika og tryggleika, og sostatt endurspeglar búmerkið sera væl virksemið í bygninginum, har ið millum annað Norðoya Sparikassi og vit í LÍV fara at halda til í næstum, vísir Angela á.
Henry á Fríðriksmørk vann búmerkjakappingina, og sigur hann soleiðis um búmerkið:
– Sæð sum reinir formar er búmerkið bert ein sirkul og ein strika. Summi hugsa kanska um binerdátur (null-tøl og eitt-tøl), onnur síggja kanska eina krónu úr gulli og hugsa pengar. Kanska onkur fær tilsipingar til okkurt heilagt so sum eina gloriu ella eina kongakrúnu. Eg vildi, at búmerkið skuldi vera opið fyri tulkingum.
Búmerkið verður sostatt partur av grafiska samleikanum hjá nýggja bygninginum, sum altso fer at eita Óðinsbrú. Og sigast má, at navnið og búmerkið hóska væl saman, tí sum ein heild umboða tey leiðslu, framskygni og tryggleika, ið júst eru lyklaorðini hjá LÍV og Norðoya Sparikassa, sum fáast við lívstryggingar og umsita pengar hjá øðrum.
– Vit hava longu vant okkum við nýggja navnið og búmerkið, so nú gleða vit okkum bara at flyta inn tann 4. august, sigur Angela Lindenskov á Bøgarði, marknaðarsamskipari í LÍV, at enda.
Góður mai mánaður á partabrævamarknaðinum
Eftir góðu gongdina mitt í apríl helt vøksturin í partabrøvum fram í mai. Altjóða partabrøv
kastaðu heili 5,8 prosent av sær fyri mánaðin, og hetta hevur minkað árliga fallið niður í -3,9
prosent. Og nú fyrst í juni eru altjóða partabrøv aftur á næstan sama stigi sum við ársbyrjan.
Serliga vóru tað tøkni- og ídnaðarpartabrøv, sum kláraðu seg væl í mai. Partabrøv, sum
vanliga ikki ávirkast so nógv av konjunkturbroytingum, høvdu hóvligari avkast. Vøksturin í
partabrøvunum sást í nógvum pørtum av heiminum, men serliga í USA, sum fyri fyrstu ferð í
ár hevði størsta vøksturin. Donsk, norðurlendsk og evropeisk partabrøv hava tó klárað seg
best higartil í ár.
Renturnar hækkaðu í mai. Tað hevði við sær, at avkastið á teimum stuttfreistaðu
lánsbrøvunum var nær við null, meðan longfreistaðu lánsbrøvini høvdu negativt avkast.
Góða gongdin á partabrævamarknaðinum smittaði eisini vinnulánsbrøvini og lánsbrøvini úr
londum við høgari rentu, sum vuksu úr 0,5 upp í 1,2 prosent upp á ein mánað.
Dollarin er viknaður nógv í ár, men broyttist lítið í mai. Prísurin á fleiri rávørum, serliga
metallum, fór upp eftir at hava verið lágur í apríl. Og hóast størri útboð fór oljuprísurin eisini
eitt vet upp.
Hví gongst betur? Handilsátøk útsett, nýggjur fíggjarpolitikkur og vitlíkis-vøkstur
Íleggjarar hava seinastu mánaðirnar — serliga í apríl, mai og fyrst í juni — verið bjartskygdari
um møguleikan fyri búskaparligum vøkstri. Hetta hevur styrkt bæði partabrøv og
vinnulánsbrøv, hóast tað samstundis hevur trýst renturnar eitt vet upp.
Nýggja bjartskygnið um vøksturin kemst av, at forsetin í USA Donald Trump hevur útsett
ætlaninar um at leggja sera høgan toll á innfluttar vørur í 90 dagar. Harumframt hava
amerikanskir dómstólar ógildað hægstu tollsatsirnar, ið vórðu settir í gildi við
forsetakunngerð. Hetta styrkir trúnna uppá, at handilskreppan millum USA og serliga Kina og
ES ikki verður so álvarsom, sum mong óttaðust.
Harafturat hava góð roknskapartøl frá tøkni-risanum Nvidia styrkt vónina um, at
íløguvøksturin í vitlíki heldur fram við somu ferð.
Aftur at hesum hevur Trump-stjórnin kúvent í fíggjarpolitikkinum og leggur nú upp fyri
ekspansivum fíggjarpolitikki heldur enn at steðga á og minka um stóra hallið á fíggjarlógini.
Týðilig tekin eru eisini um lagaligari fíggjar- og búskaparpolitikk í bæði Asia og Europa.
Hvat nú? Tann góða, tann heldur ringa og tann grumma støðan
Sum nevnt í marknaðargreiningini fyri seinasta mánað, so ber – í stóran mun – til at býta
greiningar frá altjóða fíggjarstovnum upp í tríggjar ymsar heimsbúskaparligar støður á
fíggjarmarknaðunum næstu 3–12 mánaðirnar.
Tann góða støðan: Vit hava sæð tað ringasta í sambandi við handilskríggið, og næstu
dagarnir og vikurnar fer ein skjót niðurtrapping fram í handilskrígnum. Smátt um smátt koma
handilsavtalur í lag millum USA og tess handilssamstørv, og høgu tollsatsirnir, sum skaða
altjóða handil, fara niður.
Heimsbúskapurin fer at vaksa aftur eftir eina stutta niðurgongd orsakað av handilsóvissuni.
Vinningsbýtið hjá fyritøkunum hækkar aftur, og talið á húsagangum á lánsbrøvum heldur seg
á sama lága stigi. Tá ið tollsatsirnir lækka, fellur inflatiónin samsvarandi og nærkast
málunum hjá bæði Fed og ECB, sum er um tvey prosent. Og harvið eru longu renturnar
støðugar ella lækkandi.
Um góða støðan verður veruleiki, kunnu vit vænta okkum nýggj met á
partabrævamarknaðunum og góð avkøst – bæði á vinnulánsbrøvum og teimum vanligu.
Tann heldur ringa støðan: Ein annar bólkur av íleggjarum heldur, at eitt longri tíðarskeið
við nógvari óvissu liggur fyri framman eins og parta- og lánsbrævamarknaðirnir onga greiða
kós tykjast at hava næsta árið.
Hesi vænta, at tað fer at taka fleiri mánaðir at fáa avtalur í lag millum USA, Kina og ES. Tað
vil siga, at øðrumegin kunnu fyritøkur og íleggjarar so ella so gerast vónrík um sjálvar
samráðingarnar, men hinvegin fer óvissan um, hvussu leingi samráðingarnar vara, og
hvussu úrslitið verður, í fleiri ársfjórðingar at tálma vøkstrinum, inntøkunum og íløgudirvinum.
Hetta fer eisini at avmarka møguleikarnar hjá serliga amerikanska miðbankanum (Fed) at
lækka renturnar.
Tann grumma støðan: Triði bólkurin – teir svartskygdastu íleggjararnir og fíggjarstovnarnir
– meta, at vit longu eru í einum sokallaðum “bear-marknaði”, har stórar lækkingar í
partabrævakursunum kunnu væntast. Um talan er um ein vanligan bear-marknað, eru
lækkingarnar hóvligar; men um tað er ein strukturellur bear-marknaður, sum vit sóu í
fíggjarkreppuni í 2008 og IT-bløðruni í 2000, kunnu fallini vera so stór sum upp í 50 prosent.
Tíðarskeið við slíkari niðurgongd vara vanliga millum 1½ og 4 ár, og tað kann taka úr fimm
árum og heilt upp í 20 ár at vinna tapini innaftur.
Tey svartskygdu halda, at USA kanska fær nakrar minni handilsavtalur í lag, og at tað fer at
taka longri tíð ella als ikki at eydnast at fáa størri avtalur í lag við Kina og ES. Síðan kemur
búskaparligur stígur í, sum leiðir heimsbúskapin út í eina altjóða afturgongd.
Tað vil siga stórar niðurskrivingar í virðum, fleiri húsagangir, størri arbeiðsloysi og størri
inflatión – ein støða, sum ger tað torført hjá miðbankum at gera nakað fyri at lætta um
búskaparligu kreppuna
Kom við á okkara seinastu Mentanarnátt, í næstum flyta vit í nýtt høvuðssæti á Óðinshædd.
Vit takka fyri okkum í Kopargøtu 1 við einum brakið.
Kl. 16:30 LÍV-garðurin letur upp, opið er til kl. 21:00
Á skránni eru tiltøk til børn og barnsligar sálir, eisini verður livandi tónleikur og undirhald.
Skráin fyri mentanarnáttina 2025:
Í LÍV-garðinum verður m.a. rørsluveiða, fiskibrunnur, gullgrevstur og vindmyllur til børnini. Ábit verður frá 17:00-19:00 ella so leingi, tað røkkur.
17:00 Klovnurin BUBU
18:00 Gudny Rasmussen
19:00 Marius Ziska
20:00 SAKARIS
21:00 LÍV-garðurin letur aftur.
Vinnararnir av rørsluveiðuni verða kunngjørdir á sosialu miðlunum.
Tiltakið er úti, tískil eru øll vælkomin oman at hugna sær úti saman við okkum í LÍV-garðinum!
Síggjast vit?
Partabrøv og rentur fullu nógv í mars og fyrst í apríl
Apríl gekk í tveimum. Stór partabræva kursfall vóru fyrst í mánaðinum og síðani hækking.
Hesi bæði tilsamans gjørdu, at samlaða tapið á altjóða partabrøvunum í apríl var 4%. Donsk
partabrøv megnaðu at vinna alt tapið innaftur.
Í fyrstu atløgu vendur íleggjarar sær burtur frá amerikonskum partabrøvum, teimum cyklisku
ella ringpartabrøvunum og vakstrar- og dygdarpartabrøvum, men íleggjararnir komu aftur til
hesi í aðru atløgu.
Fjálturin á partabrævamarknaðunum smittaði lánsbrævamarknaðin – fyrst og fremst í USA –
har renturnar fyrst fóru upp og síðani fullu. Men eisini har sissaðist gongdin sum mánaðurin
leið, og renturnar í Evropa fóru niður, soleiðis apríl endaði við positivum avkasti – tó ikki á
lánsbrøvum í hárentulondum.
Rávøruprísurin kom somuleiðis undir trýst, tá ið dollarin fyrst fall og síðan styrknaði nakað
aftur mótvegis evruni og donsku krónuni.
Hví? Alt snýr seg um Trump, Kina og handilskríggj
2.apríl hækkaði amerikanski forsetin Donald Trump tollin munandi meira enn væntað á allar
innfluttar vørur – og serliga á vørur úr Kina. Onnur lond hava fingið ein samráðingarsteðg
upp á 90 dagar fyri at semjast um nýggjar tollsatsir. Trump hevur gjørt fleiri undantøk í apríl.
Kina hevur svarað aftur við líknandi revsitolli á amerikanskan útflutning til Kina, meðan ES er
á veg við sínum samráðingaruppleggi.
Vandin fyri altjóða handilskríggi og altjóða búskaparligari afturgongd økist av hesum. Og tað
gera vandin fyri negativum BTÚ-vøkstri, minni vinningi hjá fyritøkum, fyri inflatión og
vaksandi arbeiðsloysi eisini. Fyri amerikanska brúkaran virka hægri tollsatsir upp á sama
máta sum ein stór skattahækking, og harafturat elvir óvissan um altjóða handilsskipanina til,
at nógv virksemi steðgar upp í vinnuni, sum bíðar eftir, at greiða er fingin á hesum
viðurskiftunum.
Tí eru allir búskaparfrøðingar samdir um, at tess longri óvissan um handilskríggj og revsitoll
varir, tess størri skaða fáa búskaparligi vøksturin og inntøkurnar hjá fyritøkunum.
Marknaðarkreftirnar eru tískil stýrdar av útsagnunum hjá Donaldi Trump um handilskríggj ella
ikki handilskríggj og aftursvarunum úr Kina. Av tí sama ferðast kursirnir upp og niður bæði av
ótta fyri einari búskaparligari afturgongd og av lætta um, at Trump letur til at sissast, tá ið
toppstjórar og fíggjarmarknaðir ganga í móti honum. So hann kann ávirkast.
Hvat nú? Tann góða, tann eitt sindur ringa og tann grumma støðan
Lesur mann marknaðarviðmerkingar og greiningar frá altjóða fíggjarstovnum í hesum døgum
kann mann – sagt ógvuliga einfalt – býta tær sundur í tríggjar ymsar støður næstu 3-12
mánaðirnar.
Tann góða støðan: Vit hava sæð tað ringasta av handilskríggi, og næstu dagarnar og
vikurnar minkar ósemjan skjótt, og so líðandi verða handilssáttmálar gjørdir millum USA og
tess handilsfelagar. Høgu tollsatsirnir, sum virka sum eitur fyri altjóða handilin, fara eisini
niður.
Ferð kemur á aftur altjóða vøksturin, inntøkuvøksturin í vinnuni og talið á húsagangunum
innan fyri vinnulánsbrøvini heldur seg á lágum stigi. Sama gongd er á inflatiónini sum uttan
revsitoll, og hon nærkast málinum hjá Fed og ECB, sum er 2 prosent og heldur longu
renturnar støðugar ella til eitt avmarkað fall.
Tekur hendan støða seg upp, fara vit at síggja nýggj partabrævamet og góð avkøst á
vinnulánsbrøvum og vanligum lánsbrøvum.
Tann eitt sindur ringa støðan (men tað er heldur ikki verri enn so): Vit fara inn í eitt
longri tíðarbil við óstøðugum marknaðarprísi, har partabræva- og lánsbrævamarknaðirnir
onga kós hava næsta árið.
Teir vænta, at tað fer at taka fleiri mánaðir at fáa handilssáttmálar millum USA, Kina og ES
upp á pláss. Vinnan og íleggjarar vera øðrumegin hildin til av ítøkiligu teknunum um
samráðingar, men óvissan um, hvussu leingi samráðingarnar vara, og hvat úrslitið av
teimum verður, fer at tálma altjóða vøkstrinum í fleiri ársfjórðingar.
Tann grumma støðan:
Íleggjarar og fíggingarstovnar vænta sokallaðu partabræva bear-marknaðarstøðuna. Tað vil
siga stór kursføll sum í ringasta føri kunnu vera so stór sum 50 %. Seinast vit sóu so stór føll
var undir fíggjarkreppuni í 2008 og KT-bløðruni í 2000. Slík afturgongd vara vanliga
hálvtannað til fýra ár, og tað kann taka úr fimm upp í 20 ár at fáa tapini innaftur.
Tey svartskygdastu halda, at USA fer at gera nakrar smærri handilssáttmálar, men at tað
dregur út ella als ikki eydnast at fáa nakað upp á pláss millum USA, Kina og ES. Álvarsami
búskaparligi skelkurin togar heimsbúskapin niður í eina búskaparliga afturgongd og hevur við
sær risastórar niðurlagingar. Samstundis verða fleiri húsagangir, arbeiðsloysið veksur og
inflatiónin verður størri í eitt tíðarbil, sum avmarkar møguleikarnar hjá miðbankunum til at
bøta um afturgongdina.
Við hægstu inngjøldum til eftirlønir og tryggingar higartil royndist árið 2024 væl – hjá bæði felagnum og kundunum hjá P/F Tryggingarfelagnum LÍV
Árið 2024 royndist væl –hjá bæði felagnum og kundunum hjá P/F Tryggingarfelagnum LÍV.
Fíggjarmarknaðurin háttaði sær væl í 2024, sum hann eisini gjørdi í 2023. Felagið fekk eitt samlað avkast av íløguognunum upp á góðar 356,5 mió.kr. Kundar við marknaðarretnu fingu eitt avkast millum 6,82% og 19,08%. Avkastið er tongt at, hvørjum váða kundin hevur valt. Kundar við varnasta váðanum fingu eitt avkast upp á 6,82%, meðan kundar við partabrøvum burturav fingu eitt avkast upp á 19,08%. Miðalkundin við 15 árum upp til eftirlønaraldur fekk eitt avkast upp á 10,20%.
Kundar við miðal váðan hjá LÍV fekk eitt nakað betri avkast enn samsvarandi kundin hjá donsku eftirlønarfeløgunum eftir skatt. Tað fegnast felagið um.
Inngjøldini til eftirlønir og tryggingar vóru góðar 453 mió.kr. Tað hægsta higartil. Inngjaldsvøksturin í mun til 2023 var upp á umleið 9,2%.
Gongdin í kundatilgongd og inngjaldi hevur lagt lunnar undir, at felagið lækkaði umsitingarkostnaðin hjá kundum við marknaðarrentu. Umsitingarkostnaðurin lækkaði úr 3% av inngjaldinum niður í 2,5% frá 1. januar 2025.
“Samhaldsfesti við, at fleiri herðar bera byrðuna, skal koma kundunum, sum eiga felagið, tilgóðar. Tí verður umsitingarkostnaðurin hjá kundum við marknaðarrentu enn eina ferð lækkaður við virknaði frá 1. januar 2025”, sigur Jan Jakobsen, stjóri í Tryggingarfelagnum LÍV.
Nú vit eru farin inn í 2025, reka nøkur svørt skýggj uppi yvir fíggjarmarknaðinum. Óvissan er størri enn vanligt, og eitt møguligt handilskríggj millum fleiri av stóru búskapunum í heiminum hóttir. Hetta skapar óvissur, og tað sæst aftur á fíggjarmarknaðinum fyrstu mánaðirnar í 2025.
Niðanfyri síggjast lyklatøl fyri roknskapin fyri 2024, sum bleiv góðkendur á aðalfundinum 30. apríl 2025:
Tryggingargjøld
Útgoldnar veitingar
Úrslit av íløguvirksemi
Úrslit eftir skat
Eginogn
Samlaðar ognir
453,3
162,8
353,0
12,7
185,7
4.657
Á aðalfundinum 30. apríl 2025 blivu Hanna í Horni (næstforkvinna), Kári Petersen, Súni Selfoss og Árni Arge afturvald. Nevndarformaðurin Høgni Olsen hevði boðað frá, at hann ikki tók við afturvali. Í hansara stað bleiv Árni Ellefsen valdur. Felagið takkar Høgna Olsen fyri innsatsin, sum hann hevur lagt eftir seg seinastu átta árini sum nevndarformaður í felagnum, og somuleiðis ynskir felagið Árna Ellefsen til lukku við valinum.
P/F LÍV lívs –og pensjónstryggingarfelagið hevði eisini aðalfund 30. apríl 2025. Afturvald blivu Finn Danberg, sum heldur fram sum nevndarformaður, Gunnleyg Árnafjall, sum heldur fram sum næstforkvinna, meðan Kári Petersen og Árni Arge blivu afturvaldir sum nevndarlimir. Høgni Olsen stillaði ikki uppaftur, og í hansara stað bleiv Árni Ellefsen valdur.
LÍV 3 er eitt avtøkufelag, sum ikki stovnar nýggjar eftirlønaravtalur. Felagið hevur tryggingaravtalur við veitingartrygd, sum Føroya Landsstýri veðheldur fyri.
Felagið hevði eitt gott 2024. Úrslitið av íløguvirkseminum gav eitt avkast upp á knappar 214 mió.kr. Felagið hevur íløguognir fyri umleið 1,978 mia.kr.
Felagið hevði eitt úrslit upp á 126,4 mió.kr. eftir skatt. Samlaðu tryggingarinngjøldini fyri verandi tryggingaravtalur vóru 37,3 mió.kr. í 2024.
Grundað á veitingarskylduna hjá felagnum mótvegis tryggingartakaranum hevur móðurfelagið eina negativa eginogn upp á 479,4 mió.kr. við árslok 2024.
Ársfrásagnirnar 2024 síggjast her.
Altjóða partabrøv fullu heili 7,5 prosent í mars, og lækkingin heldur fram fyrst í apríl. Harvið er
samlaða kursfallið síðani ársbyrjan komið upp á 15,9 prosent. Kurstapini hava verið størst á
amerikonsku partabrøvunum, eins og ein lægri dollari eisini hevur togað tøknipartabrøv og
konjunkturviðbrekin partabrøv niður. Partabrøv, sum ikki eru so árinilig av búskaparligum
sveiggjum, umframt value-partabrøv, hava minstu virðislækking.
Hinvegin er kursurin á tryggu ríkis- og realkreditlánsbrøvunum farin upp, tí at bæði longu og
stuttu renturnar lækka. Fjálturin á marknaðinum hevur so líðandi eisini breitt seg til
virkislánsbrøv, men her er tó talan um sera avmarkað tap.
Prísurin á rávørum sum til dømis olju, kopari, gulli og silvuri er lækkaður nógv.
2.apríl hækkaði Donald Trump, forseti í USA, tollin á øllum vørum, sum verða innfluttar til USA,
rættiliga nógv meira enn væntað. Kina hevur svarað aftur við líka høgum revsitolli á
amerikanskar útflutningsvørur til Kina, meðan ES er á trappusteininum við sínum aftursvari til
USA.
Alt hetta økir um vandan fyri einum altjóða handilskríggi og einum altjóða búskaparligum
niðurtúri við negativum BTÚ-vøkstri, minni inntøkum til fyritøkur og inflatión og vaksandi
arbeiðsloysi. Tollhækkingin hevur sama virknað á amerikanskar brúkarar sum ein
skattahækking. Samstundis steðgar nógv virksemi í fyritøkum upp, tí fyritøkurnar bíða eftir, at
greiða er fingin á óvissuni um altjóða handilsskipanina.
Tí eru allir búskaparfrøðingar samdir um at tess longri tíð óvissa er um handilskríggj og revsitoll,
tess størri verður skaðin á búskaparliga vøksturin og inntøkurnar hjá fyritøkunum.
Næstu tíðina verður sjóneykan tí sett á, um avtalur kunnu gerast millum tey trý búskaparligu
stórveldini, sum aftur kunnu minka um óvissuna. Tað hevði verið sera positivt fyri
partabrævamarknaðin, virkislánsbrøvini og rávøruprísirnar.
Beint nú eru ongar ábendingar um vælvild frá Trump-stjórnini, men nógvir íleggjarar vóna, at
trýstið frá einum alsamt ónøgdari vinnulívi í USA og republikanskum politikkarum fer at fáa
Trump at umráða seg og lækka tollin aftur.
INNKALLING – til ársaðalfund í Umboðsráðnum LÍV (Ognarfelagið LÍV)
Við hesum verður innkallað til ársaðalfund hjá Umboðsráðnum LÍV týsdagin tann 22. apríl 2025, kl. 10.00 á Hotel Hilton Staravegur 13, 100 Tórshavn.
Dagsskráin er sambært § 17 í viðtøkunum.
Til ber at tilmelda seg til aðalfundin við at senda ein teldupost til emilia@liv.fo. Freist at melda seg til aðalfundin sambært § 6, stk. 2 í viðtøkum felagsins er 14. apríl kl. 10:00.
Formansskapurin í Ognarfelagnum LÍV
Í næstum flyta vit í nýtt høvuðssæti á Óðinshædd.
Tí skipa vit fyri eini navna- og búmerkjakapping. Hevur tú uppskot um, hvussu nýggja høvuðssætið á Óðinshædd skal eita ella uppskot um búmerkið, ið skal prýða bygningin, hevur tú møguleika at royna teg í kappingini.
Nýggi bygningurin er í trimum hæddum. Norðoya Sparikassi og LÍV fara at leiga ávikavist niðastu og ovastu hæddina, meðan miðhæddin ætlandi verður skrivstovuhotell, sum passar væl til smærri feløg og fyritøkur.
Vit kunnu hugsa okkum, at bygningurin hevur eitt stutt og fangandi navn, og eitt búmerki, sum hóskar væl til virksemið í bygninginum.
Øll kunnu vera við í kappingini, og einki mark er fyri, hvussu nógv uppskot tú kanst senda inn. Tað er ongin treyt at hava uppskot um bæði navn og búmerki. Tú kanst senda uppskot um navn, um búmerki ella bæði tvey.
Virðisløn upp á kr. 5.000 verður latin fyri besta navn og 5.000 kr. fyri besta búmerki.
Ein dómsnevnd verður sett til at meta um uppskotini.
Dómsnevndin tilskilar sær rætt til frítt at velja millum uppskotini – eisini til einki at velja, umframt at tillaga og/ella samanseta ymisk uppskot.
Send títt uppskot við frágreiðing til kapping@liv.fo áðrenn 14. apríl 2025.
Upplýs navn, bústað og telefonnummar í teldupostinum.
Ert tú við í kappingini, gevur tú LÍV samtakinum varandi loyvi til at nýta, broyta og almannakunngera navnið, búmerkið og møguligt tilhoyrandi tilfar (so sum lýsingar ella frágreiðingar) uttan samtykki ella endurgjald.
Eru tit rætt tryggjað, um lívið skuldi háttað seg øðrvísi enn ætlað?
Ognarmissur er harmiligur, men rakar ikki líka hart, sum um makin fellur frá.
Tað kann gerast ein dyggur fíggjarligur smeitur fyri familjuna.
Við eini tilskilan ásetir tú, hvør hevur rættin til útgjaldið, um tú brádliga skuldi farið hiðani.
Á kundaportalinum Mítt LÍV sært tú, hvør er skrásettur í tíni tilskilan.
Tú kanst broyta tína tilskilan her.
Hoyr um Jens og Kristinu í filmsbrotinum:
