Category: Tíðindi

Vit hava ENN einaferð megnað at seta umsitingarkostnaðin niður.

LÍV hevur sum aðalmál, at ágóðin hjá felagnum skal koma kundunum til góðar.  
 
Felagið hevur seinnu árini bjóðað nógvum nýggjum kundum vælkomnum. Hetta ber við sær, at alt fleiri herðar eru at bera samlaðu byrðarnar.
 
Við útgangsstøði í góðu gongdini hevur felagið enn einaferð valt at lækka umsitingarkostnaðin fyri kundarnar hjá P/F Tryggingarfelagnum LÍV, sum hava marknaðarrentuskipan, talan er um kundar við uppsparing sum er stovnað eftir 2012.
 
Frá 1. januar 2025 lækkaði umsitingargjaldið av árliga inngjaldinum til eftirløn góð 16%. Umsitingarkostnaðurin av inngjaldinum lækkar úr 3% niður á 2,5%. Spardi umsitingarkostnaðurin verður lagdur afturat eftirlønaruppsparingini hjá kundanum, soleiðis at meira verður eftir til eftirlønina, tá ið kundin fer av arbeiðsmarknaðinum. Fasta árliga gjaldið verður óbroytt kr. 150.
 
Síðani 2016 er umsitingargjaldið av árliga inngjaldinum lækkað úr 6% niður á 2,5%, ímeðan árligi fasti kostnaðurin er lækkaður úr kr. 300 niður á kr. 150.

Alt gera vit, so tú kanst hugsavna teg um títt LÍV.

Negativur endi á 2024, sum var eitt positivt íløguár, men stórir munir á
avkøstum

Eitt megnar partabrævaár, sum hevur givið upp í 25% í avkasti á
alheimspartabrøvum endaði við einum lítlum kursfalli í desember upp á 0,4%. Men
hetta lítla fallið fevnir tó um stóran vøkstur í nøkrum fáum amerikonskum tøkni-partabrøvum, tey sonevndu Magnificent-7, og annars kurstap í stórum pørtum av
restini av marknaðinum.

Donsk partabrøv høvdu enn ein vánaligan mánað, har tey vórðu drigin niður av
einum stórum falli í Novo-partabrævinum og endaðu desember við einum falli upp á
3,9%. Um hugt verður at øllum 2024, endaði avkastið við einum lítlum minusi upp á
0,6% ella heili 33 prosentstig lægri enn avkastið hjá ársins vinnara, teimum
amerikonsku partabrøvunum. Hetta er annað árið á rað, at donsk partabrøv liggja so
langt aftanfyri.

Í USA eru longu renturnar løgið nokk farnar upp, síðani amerikanski miðbankin Fed, í
heyst fór undir at lækka stuttu rentuna. Rentuhækkingin í USA hevur lutvíst smittað
renturnar í Evropa og Danmark, og tí var avkastið á lánsbrøvum eisini negativt í
desember. Undantakið er váðafullu vinnulánsbrøvini, tey sokallaðu high yield – lánsbrøvini, sum kastaðu eitt lítið pluss av sær.

Hví? Bjartskygni um vitlíki, nýggj inflatión og skuldarófriður, ”Trump-handilin”
steðgar upp

Amerikanski búskapurin heldur fram við at yvirraska positivt við størri vøkstri og fleiri
nýggjum arbeiðsplássum enn væntað. Samstundis er inflatiónin farin at vaksa aftur,
eftir at hon annars var fallin nógv – so nógv, at hon nærkaðist málinum hjá Fed, sum
er at tola príshækkingar upp í mesta lagi 2% um árið. Inflatiónin í USA veksur í løtuni
2,7%, og pílurin peikar uppeftir.

Vakstrar- og inflatiónstølini, ið eru hægri enn áður væntað, minka um álitið á, at Fed
framhaldandi fer at lækka stuttu renturnar, sum tey annars hava sagt seg vænta at
gera í 2025. Hetta trýstir renturnar upp. Rentan hækkar eisini orsakað av stúranini
fyri skuldarstøðuni í USA. USA koyrir í hesum árum við risastórum halli á
fíggjarlógini, sum vanliga bara síggjast í kreppu- ella krígstíðum. Til tess at fíggja
stóra holið í fíggjarlógini skulu nógv statslánsbrøv seljast á marknaðinum.

Hægri rentur hava við sær, at marknaðarvirðið á verandi lánsbrøvum fellur, og verða
lánsbrøvini sostatt bíligari at keypa og meira lokkandi samanborið við partabrøv. Tí
eru rentuhækkingarnar eisini farnar at tálma partabrævavøkstrinum. Men framvegis
hoyrast bjartskygdar røddir um vitlíki frá fremstu tøknifyritøkunum, og tí klára tey seg
betur enn restin av partabrævamarknaðinum. Tó eru tekin um broytingar, tí
tøknipartabrøvini eru høgt virðismett í løtuni.

Umframt hægri rentuna hevur partabrævamarknaðurin í 2025 eisini avbjóðingar
orsakað av stórum væntanum. Eitt er, at nógv partabrøv verða seld við høgari
virðisáseting, og eitt annað er, at partabrævagreinarar vænta, at feløgini kunnu økja
um longu stóra vinningin við 15-20 prosentum afturat í ár.

Alt bíðar eftir Trump

Øll bíða spent eftir at síggja, hvønn politikk Trump fer at føra, tá ið hann verður
forseti aftur 20. januar 2025. Einki er vist, halda flestu serfrøðingar, tí Trump er
kendur fyri at siga nógv, ið ofta fer í ymsar ættir. Tað er støðan í Grønlandi seinastu
vikurnar eitt gott dømi um.
Í løtuni verður tosað um eina positiva støðu og eina negativa støðu tíðina eftir 20.
januar:

• Positiv støða: Størri vøkstur og vinningur orsakað av lægri skattum í USA,
  minni inflatiónstrýst orsakað av størri amerikanskari oljuframleiðslu og avtala
  við Kina um handil og ein loysn upp á støðuna í Ukraina.
•  Negativ støða: Hækkandi rentur og størri inflatión trýsta alheims
  bústaðarmarknaðir, serstakliga tann amerikanska og partar av
  húsarhaldsnýtsluni. Samstundis fellur heimshandilin, tí handilsfelagarnir hjá
  USA finna seg ikki í hægri tolli á sínar vørur frá Trump, og tí svara tey aftur.

Eitt víðfevnt handilskríggj við hægri tolli á vørum úr Kina og ES fer at hava við sær,
at amerikanska inflatiónin økist við upp í 2 prosentstig eins og vøksturin verður lægri,
og tískil elva til stagflatión. Og so býttur er Trump ikki, halda nógvir serfrøðingar.
Hann verður kanska eisini forðaður av tí, at veljararnir eru í móti hækkandi
brúkaraprísum, og at Kina kann raka USA hart við einum aftursvari.

Stórur fíggindaskapur er móti Kina tvørtur um floksmarkið í USA, og Peter Navarro,
sum er sera atfinningarsamur mótvegis Kina, er komin upp í toymið hjá Trump. Hesi
viðurskifti tala fyri einari harðari tilgongd til Kina.

Vit vita nógv betur eftir 20. januar.

Positiv november-avkøst
Í november kastaðu altjóða partabrøv heili 7 prosent av sær, og eru tey harvið hækkað 26
prosent síðani november í fjør. Amerikonsk partabrøv hækkaðu meira enn 10 prosent í
november, millum annað orsakað av einum styrktum dollara, meðan donsk og norðurlendsk
partabrøv og nýggir marknaðir lækkaðu. Nøkur av teimum, sum hækkaðu mest, vóru Small
cap- og bankapartabrøv.
Ógvuliga stórur munur hevur verið á toppi og botni á partabrævamarknaðunum í ár, og
nøkur fá sera stór amerikonsk tøkni-partabrøv hava tikið tyngsta lessið. Orsakað av hesum
hava nógvir íleggjarar heldur ikki í ár fingið marknaðaravkastið. Síðani í november í fjør hava
amerikonsk partabrøv kastað 35 prosent av sær. Til samanberingar hava eitt nú tey donsku
kastað 3 prosent av sær. Hetta er eitt søguligt eftirsleip og annað árið á rað, at donsk
partabrøv liggja langt aftanfyri, eftir at hava kastað væl av sær í nógv ár.
Eitt tíðarbil við hækkandi rentum bleiv í november avbrotið við rentulækking í Evropa og
Danmark. Tað skapti góð avkøst á donskum lánsbrøvum, serstakliga teimum longu
virðisbrøvunum, sum høvdu eitt avkast upp á 2½ prosent. Óbroytt rentuspenni og lækkandi
rentur góvu eisini vinning á kreditt-lánsbrøvum í síðsta mánaði. Tilsamans hava lánsbrøvini
kastað av sær 2-6 prosent síðani november í fjør, sum er stak gott.

Hví? Lætti eftir valið í USA, trúgv upp á amerikanskt sjáldsemi
Avkøstini í november koma fyrst og fremst av haldgóðum makrotølum úr USA og einum
tryggum valsigri til Donald Trump. Harvið slapst undan drúgva valórógvinum, sum mong
óttaðust fyri undan valinum. Góða gongdin við partabrøvum og bitcoin stendst væntandi av
lægri vinnuskatti og lagaligari stýring av vinnulívinum og krypto-gjaldoyrum í 2025, eftir at
Trump hevur tikið við sum forseti.
Hálvvánalig vakstrartøl og politisk órógv í ES høvdu við sær rentulækking í Evropa, og at
evran viknaði. Ótti fyri avleiðingunum av handilspolitikkinum hjá Trump næstu tíðina fingu
eisini partabrævamarknaðirnar uttan fyri USA at vikna.
Tað letur til, at Trump-valið og órógvin í Evropa hava sett ferð á leitanini eftir amerikonskum
partabrøvum og trúnna upp á amerikanskt sjáldsemi – tað vil siga trúnna uppá, at
amerikanskur búskapur og partabrøv eru sterkari enn restin av heiminum.
Andsøgnin í hesum er, at um Trump førir ágangandi handilspolitikk, so fara ES og Kina ikki
at hyggja tigandi at, men heldur leggja seg eftir at raka USA meint, sum átti at rakt
partabrævamarknaðin.

Øll bíða eftir Trump 20. januar 2025
Øll bíða í spenningi eftir at vita, hvat slag av politikki Trump fer at føra, tá ið hann tekur við
aftur sum forseti tann 20. januar 2025. Hugburðurin millum flestu serfrøðingar tykist vera, at
einki er vist, tí Trump er kendur fyri at siga nógv, sum fer í ymsar ættir.
Beint nú verður tosað um eina positiva støðu og eina negativa støðu í tíðini eftir 20. januar:

• Positiv støða
– Størri vøkstur og vinningur orsakað av lægri skatti í USA, minni
inflatiónstrýst orsakað av størri amerikanskari oljuframleiðslu, avtala

við Kina um handil og loysn upp á Ukraina
• Negativ støða
– Vaksandi rentur, størri inflatión, altjóða bústaðarmarknaðir serstakliga
tann amerikanski og nýtsla, sum ávirkast lættliga av rentum, eru undir
trýsti og veikari altjóða handil, tí handilsfelagarnir hjá USA svara aftur

Eitt víðfevnt handilskríggj við høgum tolli á vørur úr Kina og ES fer at elva til størri inflatión
og minni vøkstur í USA. Inflatiónin kann økjast við 2 prosentstigum, eins og vøksturin verður
seinkaður, og tað hevur tí við sær, at búskaparligur stígur kemur í. Og so býttur er Trump
ikki, meta nógvir íleggjarar. Tað fer kanska eisini at seta sínar avmarkingar, at veljararnir eru
í móti vaksandi prísum, og at Kina kann koma við hørðum aftursvari.
Hinvegin er stórur fíggindaskapur mótvegis Kina tvørtur um flokkar í USA, sum saman við tí,
at Kina-atfinningarsami Peter Navarro er valdur upp í Trump-toymið, talar fyri einum
bonskum arbeiðslagi mótvegis Kina.

Við nýggju avtaluni er LÍV framvegis høvuðsstuðul hjá Rescue LÍV.
Stuðuls- og samstarvsavtalan hevur til endamáls at stuðla virkseminum hjá bjarginarbátinum Rescue LÍV og tryggja, at raksturin av bátinum er í tryggari legu.

Nýggja avtalan er fyri árini 2025 og 2026.
Vit fegnast um at vera høvuðsstuðul og gleða okkum til eitt framhaldandi gott samstarv við Rescue LÍV.

Á myndini: Michael Thomsen, Rescue LÍV og Jan Jakobsen, LÍV

LÍV verður eisini samlagstryggingarveitari hjá Havnar Handverkarafelag næstu fimm árini. Tað er greitt, eftir at partarnir hava gjørt nýggjan sáttmála

Havnar Handverkarafelag hevur havt útboð av sínum samlagstryggingarsáttmála, har felagið aftur hevur valt LÍV til sín veitara. Tað vil siga, at LÍV er tryggingarveitari hjá Havnar Handverkarafelagi og fýra øðrum feløgum, sum Havnar Handverkarafelag umboðar. Tey eru: Vágs Handverkarafelag, Tvøroyrar Handverkarafelag, Skála Handverkarafelag og Grafiska Yrkisfelagið.

“Hetta frøast vit um á LÍV, tí hetta staðfestir, at LÍV er á rættari kós við kappingarførum prísum og tryggingum. LÍV sær fram til samstarvið næstu fimm árini og takkar fyri álitið okkum er litið upp í hendur” sigur Jan Jakobsen, stjóri á LÍV.

Sáttmálin millum Havnar Handverkarafelag og LÍV er galdandi í fimm ár. Limirnir í Havnar Handverkarafelagi og hinum feløgunum fáa m.a. hesar tryggingar:

–        við deyða

–        við deyða hjá hjúnafelaga/sambúgva

–        við ávísum hættisligum sjúkum hjá sær sjálvum ella børnum undir 21 ár

–        hoyritól

–        inngjaldstrygging

–        Fulnaður fyri terminala sjúkuavgerð, sum fyrsta fakfelagið í Føroyum

Samhaldsfasta skipanin tryggjar øllum limunum einfalda og ómaksleysa atgongd til tryggingar hjá feløgunum.

“Eitt høvuðsendamál hjá felagnum er at veita limunum góð tryggingarviðurskifti. Hetta metir felagið seg hava nátt við nýggju avtaluni, sum eisini gevur limunum nýggjar møguleikar” sigur Eli Brimsvík, formaður í Havnar Handverkarafelag.

Limirnir í Havnar Handverkarafelagi og hinum fýra feløgunum kunnu síggja sínar tryggingar við at innrita á kundaportalin MíttLÍV hjá LÍV við samleikanum.

Sáttmálin er galdandi frá 1. januar 2025

LÍV og Bókaklubbin hjá Bókadeild Føroya Lærarafelags skrivaðu í dag undir trý ára avtalu, sum inniber, at LÍV er høvuðsstuðul hjá Bókaklubbanum í Føroyum.

Bókaklubbin arbeiðir miðvíst við at geva børnunum spennandi og viðkomadi bøkur á føroyskum máli.
Sum limur í bókaklubbanum fær man átta bøkur um árið og fært tú altíð eina bók, sum hóskar júst til tín.
Lesing er við til at stimbra málmenningina hjá børnum og hetta stuðlar bókaklubbin undir við frá ungum árum av og heilt upp til tannárini.
Eins og lesing frá ungum árum er við til at menna málið, so er hetta eisini við til at betra um lesihugin, hugsavning, hugflogið og persónliga menning hjá børnum, hetta er ein av grundleggjandi pørtunum av trivnaði og heilsu hjá børnum.

LÍV fegnast um at vera høvuðsstuðul hjá Bókaklubbaum í Føroyum og gleða vit okkum til eitt gott samstarv við Bókaklubban hjá Bókadeild Føroya Lærarafelags.

Væntaður Trump-sigur gav rentuvøkstur og styrktan dollara

Longu renturnar hækkaðu enn meira í oktober og høvdu við sær tap á flestu lánsbrøvum. 
Tapini liggja millum -0,2% á stytru lánsbrøvunum og -1 til 3% á longru lánsbrøvunum. Bara 
vinnulánsbrøv við lægst kreditvirði, tað eru high yield lánsbrøv, sum minna nakað um 
partabrøv, vuksu í virði. Av tí at rentan lækkaði fyrr í ár, hava øll sløg av lánsbrøvum havt 
meðalgóð avkøst upp á 2-5,5% – tó ikki tey longu donsku lánsbrøvini, sum hava mist millum 
0,3-0,5% í ár.

Altjóða partabrøv kastaðu bert 0,5% av sær í oktober, men við tí helt góða gongdin 
undanfarnu mánaðirnar fram. Donsk og norðurlendsk partabrøv fullu nakað afturum, eftir at 
avkastið í oktober lækkaði góð 4% og ársavkastið 4,5%.

Í oktober hækkaði virðið á dollaranum og kryptogjaldoyrum, samstundis sum gullprísirnir 
settu met og oljuprísirnir fullu. Ein sterkur dollari og vaksandi renturnar eru ein keðilig 
samanseting, sum eisini gav eitt hall í oktober á lánsbrøvum á teimum nýggju 
marknaðunum. Summir av hesum marknaðunum, s.s. Brasil, stríðast eisini við at halda 
inflatiónini niðri, og tað órógvar enn meira.

Trump á øllum fíggjarmarknaðinum – og so Kina

Serliga batnandi veljarakanningarúrslit hjá Donaldi Trump og økt sannlíkindi fyri, at hann fór 
at blíva valdur, gjørdu sítt til, at broytingar vóru á fíggjarmarknaðunum í oktober, og 
harafturat betri tøl enn væntað í kinesiska og amerikanska búskapinum. 
Nú er Trump valdur til forseta, og reaktiónin á fíggjarmarknaðunum fyrstu dagarnar eftir 
valsigurin kunnu sigast at vera sama gongd, sum ábendingarnar í oktober góvu. Nú við størri 
megi, tí óvissan um valúrslitið í USA er burtur, og tað er í sjálvum sær positivt. Men eisini tí 
at Trump allarhelst fær meiriluta í Kongressini og kann harvið uttan mótstøðu føra tann 
politikk, sum honum lystir.

• Partabrøv eru vaksin, men fyri tað mesta í USA og nakað minnið ella als ikki uttan fyri 
  USA, tí roknað verður við færri lógum fyri vinnulívið, lægri skattum og lagaligari 
  fíggjarpolitikki og hægri amerikanskum tolli. Serliga smá amerikansk partabrøv, tøknifyritøkur og bankapartabrøv eru vaksin. Men íleggjararnir eru eisini ørkymlaðir um, at 
  størri hall á fíggjarlógini og handilskríggj kunnu elva til størri inflatión, hægri rentur og 
  kann oyðileggja vinningin hjá fyritøkunum. Útrokningar vísa, at ætlanirnar hjá Trump
  um at leggja revsitoll á vørur úr Kina fara í sjálvum sær at økja um inflatiónina í USA 
  við heili 2 prosentstigum, sum er ein skelkur fyri bæði búskapin og parta- og 
  lánsbrævamarknaðin;
  
• Kursurin á lánsbrøvum er lækkaður lutfalsliga nógv, tí nú Trump fer aftur í Hvítu 
  húsini, økist vandin fyri størri inflatión í 2025/26. Tað fellur ikki í góða jørð á 
  lánsbrævamarknaðinum. Serliga longu lánsbrøvini hava kastað lítið av sær, meðan 
  vinnulánsbrøvini hava klárað seg lutfalsliga væl. Men veksur inflatiónin, rakar tað øll 
  sløg av lánsbrøvum upp á tann ringa mátan;
  
• Gjaldoyra: Dollarin er styrktur enn meira, meðan yuan, evran, pundið og jennurin eru 
  viknað, tí væntað verður, at Trump-stjórnin fer at føra strangari handilspolitikk móti 
  bæði Kina, Evropa og Japan, so eitt av teirra aftursvarum er at minka um gjaldoyrað;
  
• Rávørur: Oljuprísirnir hava verið støðugt lækkandi, tí roknað hevur við, at Trump fer 
  at økja um oljuframleiðsluna næstu árini;
  
  Fíggjarmarknaðirnir eru sostatt í ferð við at tillaga seg til, at heimsbúskapurin flytur seg frá 
  Gull-lokk støðuni við meðalvøkstri og lítlari inflatión til eina støðu við bráðvøkstri í inflatión 
  ein sokallað “Inflationært boom”-støðuna við størri vøkstri og óvissu um inflatiónina. 
  Næstu mánaðirnar fara fíggjarmarknaðirnir at halda vakið eyga við útmeldingunum frá 
  Trump og hansara fólki, og dentur verður serliga lagdur á fýra øki: fólkaflyting, tolltakstir, 
  geopolitikk og skatt. Og fíggjarmarknaðirnir fara at reagera út frá tí, sum verður fráboðað.

Bjartskygdar og svartskygdar støður fyri Trump 2.0 og 2025

Tá ið tað kemur til, hvat vit kunnu vænta av Trump 2.0 – tað er seinna forsetaskeiðið hjá 
Donaldi Trump – eru íleggjararnir farnir í tvær legur. Eina bjartskygda legu og eina 
svartskygda. Tey bjartskygdu vænta størri vøkstur og vinning hjá fyriøkum, sum fer at lyfta 
partabrævakursirnar upp í nýggjar hæddir. Tey vóna eisini, at ein størri avtala við Kina kann 
gera enda á stríðnum í Ukraina, og harvið koma okkum undan einum altjóða handilskríggi. 
Tey svartskygdu óttast harafturímóti fyri størri og óstøðugari inflatión og hægri rentum, sum 
kunnu fáa bústaðar- og partabrævamarknaðirnar at støkka og elva til minni fíggjarligan 
vøkstur og størri geopolitiskan ófrið.

Skrivstovubygningurin hjá LÍV til sølu ella leigu.

Í samband við, at Tryggingarfelagið LÍV flytir sítt virksemi í nýtt høvuðssæti á sumri 2025, eru verandi hølir hjá LÍV til sølu ella til leigu.

Talan er um ognirnar á matr.nr. 565 og 567 í Tórshavn.

Aðalmálið er at selja ognirnar, men um nøktandi keypsboð ikki fæst, verða ognirnar leigaðar út. Tað stendur LÍV frítt at velja millum møguliga sølu ella leigu.

Keypsboð ynskjast innan 15/12-2024.

Áhugaði – bæði keyparar ella leigarar – vera biðin at venda sær til advokat Kára Davidsen á kda@faroelaw.fo, viðm: Kopargøta 1., ella á tlf. +298 22 12 78.

Positiv avkøst á bæði parta- og lánsbrøvum í september

Eins og í august var órógv á altjóða fíggjarmarknaðunum, tí ótti var fyri einum fíggjarligum niðurtúri. Men órógvið hæsaði skjótt av, og mánaðurin endaði við positivum avkøstum á bæði partabrøvum og lánsbrøvum

Altjóða partabrøv vuksu við 1,4 prosentum og eru nú vaksin heili 17,4 prosent síðan um hesa tíðina í fjør. Vøksturin er breiðari grundfestur nú enn í vár, tí tá kom allur vøksturin frá teimum sjey stóru partabrøvunum í USA, tey sokallaðu Magnificent-7. Í september hækkaðu aðrir marknaðir eisini – serliga partabrøv – eins og búskaparlig framgongd var í fleiri geirum.

Á lánsbrævamarknaðinum fall rentan á bæði teimum longu og stytru lánsbrøvunum, og tað gav vinning upp á 0,7-1,2 prosent, sum er nógv upp á bara ein mánað fyri tey lutfalsliga tryggu lánsbrøvini.

Dollarin viknaði enn meira, og tað gagnaði serliga lánsbrøvunum á marknaðunum í menningarlondum, sum høvdu ein vøkstur upp á 1,6 prosent. Virkislánsbrævamarknaðurin stóð eisini sterkur og hevði enn eina ferð positiv avkøst. Hinvegin steðgaði vøksturin í japanska gjaldoyranum.

Prísirnir á nógvum rávørum fóru upp í september eftir at hava verið fallandi leingi, tó ikki oljuprísurin. Prísurin á gull og silvuri hava tó verið vaksandi leingi, og prísurin á gulli setti nýtt met í september.

Óttin fyri afturgongd minkar, rentulækkingar og kinesisk bazooka skapa góð avkøst

Serliga tríggjar orsøkir eru til, at avkøstini í september eru góð, og at gongdin á fíggjarmarknaðinum sum heild er góð.

Í fyrsta lagi er óttin fyri afturgongd í amerikanska búskapinum minkandi, samstundis sum hagtøl benda á, at heimsins størsti búskapur framvegis er væl fyri við einum vøkstri upp á 2,5-3 prosent og framhaldandi lítlum arbeiðsloysi.

Í øðrum lagi eru miðbankar í stórum pørtum av heiminum í ferð við at lækka renturnar, tí inflatiónin er vorðin hóvligari nógvastaðni. Nakað óvæntað lækkaði týdningarmikli amerikanski miðbankin rentuna heili 0,5 prosentstig til 4,75-5,25 prosent, og evropeiski miðbankin er í ferð við at gera tað sama. Báðir bankar signalera, at fleiri rentulækkingar eru í væntu næstu ársfjórðingarnar. Lægri rentur minka í eygunum á íleggjarum um vandan fyri at enda í fíggjarligari afturgongd.

Og í triðja lagi boðaðu kinesiskir myndugleikar síðst í mánaðinum frá fleiri tiltøkum fyri at stimbra kinesiska búskapin, sum ikki koyrir so væl. Seinastu tølini fyri privatnýtsluna, fastognarmarknaðin og ídnaðarframleiðsluna vísa, at búskaparligi vøksturin í Kina liggur 5 prosent undir ætlaða vøkstrinum hjá stjórnini. Tiltøkini snúgva seg serliga um at fáa tamarhald á fallandi bústaðarprísunum og partabrævakursinum.

Fleiri avbjóðingar fyri framman

Samansetingin av vøkstri í heimsbúskapinum og hóvligari inflatión er tað, sum vit kalla Gull-lokk-støðan. Tað er, tá vit vanliga hava bestu avkøstini og positivastu marknaðirnar.

Higartil benda innkomnu dáturnar á, at positiva støðan fer at halda fram í fjórða ársfjórðingi, men kortini kunnu aðrar avbjóðingar væntast næstu mánaðirnar. Tað merkir ikki neyðturviliga kurstap, men kann merkja lægri avkøst í eitt tíðarskeið, sum ikki er ónatúrligt eftir góðu avkøstini fyrstu níggju mánaðirnar í ár.

Stór óvissa valdar enn um úrslitið av amerikanska forsetavalinum. Og vandin fyri órógv eftir valið 5. november er nógv størri, um valúrslitið ikki verður góðkent frá báðum síðum, sum nógv bendir á, at tað ikki fer at verða. Royndir vísa, at fíggjarmarknaðirnir eru óróligir, so leingi sum óvissa er um úrslitið av valinum.

Parta- og lánsbrævamarknaðurin eru á samanstoytskós. Lánsbrævamarknaðurin væntar longu munandi rentulækkingar frá miðbankunum í 2025. Men tað er bara realistiskt, um vøksturin og harvið møguleikin fyri vinningi hjá fyritøkunum, viknar. Og tað gongur beint í móti tí, sum mann væntar á partabrævamarknaðinum. Partabrævagreinarar vænta størri inntøkuvøkstur enn í undanfarnu ársfjórðingum, men hendir tað, so fara miðbankarnir helst ikki at lækka renturnar nevnivert. Komandi roknskaparsesongin, sum byrjar nakað inni í oktober, fer at siga okkum nógv um støðuna hjá ymsu fyritøkunum.

Og so er prísásetingin á mongum parta- og virkislánsbrøvum rættiliga høg. Serliga á amerikonskum partabrøvum, meðan kinesisk partabrøv eru sera bílig og nógv onnur partabrøv liggja í miðjuni. Men hetta merkir samanumtikið, at nøkur av teimum góðu tíðindunum longu eru tikin við í børskursirnar.

Í síðstu viku høvdu vit eina hugnaliga løtu saman við Sólvu, sum 15. september hevði starvast á LÍV í 10 ár.

Vit eru heppin, og fegnast um, at hava so trúgv og álítandi starvsfólk!
Vit ynskja Sólvu hjartaliga til lukku við starvsdegnum og gleða okkum til enn fleiri ár.