Category: Tíðindi

Tryggingarfelagið LÍV hevur longt stuðulsavtaluna við Rescue LÍV

Við nýggju avtaluni er LÍV framvegis høvuðsstuðul hjá Rescue LÍV.

Stuðuls- og samstarvsavtalan hevur til endamáls at stuðla virkseminum hjá bjarginarbátinum Rescue LÍV og tryggja, at raksturin av bátinum er í tryggari legu.

Nýggja avtalan er fyri árini 2027 og 2028.

Vit fegnast um at vera høvuðsstuðul og gleða okkum til eitt framhaldandi gott samstarv við Rescue LÍV.

Á myndini: Michael Thomsen, Rescue LÍV og Sólvá Hjaltalin Olsen, Kundastjóri á LÍV

Hvat hendi í september?

Altjóða partabrøv hækkaðu við 1% í september, og samlaða avkastið seinastu 12 mánaðirnar er
nú komið upp á 17%. Tað vóru serliga nøkur fá stór amerikonsk partabrøv, ið stóðu fyri positiva
avkastinum í september – fyrst og fremst tøknipartabrøv innan fyri vitlíki. Ein styrktur dollari
gjørdi eisini sítt til positiva avkastið.

Donsk partabrøv fullu heili 4,6% í september, serliga orsakað av enn einari afturgongd hjá Novo
Nordisk. Norðurlendsk partabrøv høvdu eisini ein vánaligan mánað við einum avkasti upp á
3,9%. Sum heild fullu nógv partabrøv kring heimin í september.

Oljuprísurin og renturnar hækkaðu enn meira í september. Hetta hevði við sær negativ avkøst á
øllum sløgum av lánsbrøvum, eina flatari rentukurvu og lægri prísir á dýrmetallum so sum gulli
og silvuri.

Donsk stutt- og langfreistað lánsbrøv høvdu negativ avkøst upp á ávikavist -0,4% og -1,5%.
Vinnulánsbrøv og lánsbrøv úr londum við høgum rentum høvdu somuleiðis negativ avkøst upp á
ávikavist -1,5% og heili -4%.

Hví? Bjartskygni um vitlíki vigar fyribils upp ímóti hægri prísvøkstri og rentum

Altjóða íløguhugurin, sum serliga er rikin av stórum íløgum í vitlíki, helt fram í september. Hetta
styrkti væntanirnar um inntøkurnar hjá vitlíkisfyritøkum og vigaði fyribils upp ímóti negativu
ávirkanini, sum stóru rentuhækkingarnar høvdu á nógv partabrøv í vitlíki og tøkni.

Hinvegin hava stóri lánitørvurin hjá statum og tøknifyritøkum, framhaldandi búskaparlig
framgongd kring heimin og vaksandi óvissa um prísvøksturin trýst renturnar upp. Óvissan um
prísvøksturin stavar millum annað frá áhaldandi stríðnum í Miðeystri.

Hægri renturnar hava rakt lánsbrævamarknaðirnar hart og hava eisini havt negativa ávirkan á
fleiri partabrøv uttan fyri tøknigeiran, eitt nú bankapartabrøv og partabrøv í fyritøkum, sum selja
nýtsluvørur.

Høgar rentur og ein rentukurva, sum gerst flatari, tá ið stuttfreistaðu renturnar hækka meira enn
tær langfreistaðu, kunnu gera tað truplari hjá hesum fyritøkum at reka lønandi virksemi.

Altjóða framgongdin heldur fram, men fleiri avbjóðingar eru fyri framman

Nú vit eru komin inn í fjórða ársfjórðing, heldur búskaparliga framgongdin kring heimin fram. Tað
benda í øllum førum nýggjastu kanningarnar av støðuni í vinnulívinum í Evropa, USA og Asia á.
Tær vísa allar góðan vøkstur í fleiri vinnugreinum.

Tøl fyri arbeiðsmarknaðin í USA og fráboðanir úr altjóða tøknigeiranum benda eisini á, at góðu
fortreytirnar fyri vøkstri og vinningi fara at halda fram í eina tíð afturat.

Malurtin í bikarinum er tó, at fyritøkurnar samstundis boða frá vaksandi prístrýsti.
Innkeypsprísirnir hækka, og fyritøkurnar vænta at lata príshækkingarnar fara víðari til
brúkararnar næstu mánaðirnar.

Heimsbúskapurin er sostatt í einum brávøkstri, men samstundis er prísvøksturin eisini
vaksandi. Tí eru fleiri miðbankar framvegis í ferð við at hækka renturnar fyri at forða fyri, at
prísvøksturin gerst ov stórur.

Hækkandi rentur skapa eisini órógv á fíggjarmarknaðunum, tí tað gerst dýrari at læna pengar og
at hava skuld. Væntandi fer hetta at tálma búskaparliga vøkstrinum um nakrar ársfjórðingar.
Samstundis er nýggj órógv um Frakland í evruøkinum. Landið stríðist við stórt hall á fíggjarlógini,
skjótt vaksandi statsskuld og politiska ósemju um, hvussu trupulleikarnir við skuldini skulu
loysast.

Fyribils – tað vil siga næstu vikurnar og mánaðirnar – fara fíggjarmarknaðirnir serliga at hava
eyguni eftir roknskapunum fyri triðja ársfjórðing, gongdini í krígnum í Iran,
handilssamráðingunum millum ES og Kina og órógvinum um skuldarstøðuna í evruøkinum.

Hyggja vit longri fram, verður avgerandi, um vøksturin í vitlíki er haldførur. Tað fer at hava stóran
týdning fyri, um búskaparliga framgongdin kring heimin og positiva gongdin á
partabrævamarknaðunum fara at halda fram.

Fleiri vinnugreinar, og ikki bara tøknigeirin, njóta í hesum ársfjórðingunum gott av stóru
íløgunum í telduútgerð, dátamiðstøðir og annað tøkniligt undirstøðukervi.

Fríggjadagin 9. oktober er stongt vegna starvsfólkadag.
Vit eru at hitta aftur sum vant mánadagin 12. oktober.

Átrokandi boð kunna sendast á liv@liv.fo

Við hesum verður innkallað til eyka aðalfund í Ognarfelagnum LÍV hósdagin tann 22. oktober 2026, kl. 12.30 í høvuðssætinum hjá LÍV, Óðinshædd 11, 100 Tórshavn.

Á skránni er: Viðtøkubroytingar.

Innkomin uppskot til viðtøkubroytingar síggjast her

Til ber at tekna seg til eyka aðalfundin við at senda ein teldupost til ognarfelagid@liv.fo.

Freist at boða frá luttøku til aðalfundin sambært § 6, stk. 2, í viðtøkum felagsins, er 14. oktober kl. 12:30.

Formansskapurin í Ognarfelagnum LÍV

Nevndirnar í P/F Tryggingarfelagnum LÍV og P/F LÍV Lívs- og pensjónstryggingarfelag hava sett Rune Nørregaard sum nýggjan stjóra fyri LÍV-samtakið. Í sambandi við setanina hevur Annbritt Tummasdóttir Andersen frá Momentum Consulting verið uttanhýsisráðgevi hjá nevndunum og staðið fyri setanar- og metingartilgongdini. Rune tekur við starvinum eftir nærri avtalu.

Sum stjóri fer Rune Nørregaard at standa á odda fyri at menna LÍV við serligum denti á at styrkja raksturin, skapa góð og støðug úrslit og seta eina greiða, strategiska kós fyri samtakið.

– Rune hevur drúgvar leiðsluroyndir og holla vitan um banka-, tryggingar- og eftirlønarøkið. Eg kenni hann sum ein sera dugnaligan og úrslitagóðan leiðara, ið megnar at sameina strategiskt yvirlit við tryggan rakstur og greiða leiðslu. Hann kennir føroyska samfelagið og vinnulívið væl, og nevndirnar eru sannførdar um, at hann er rætti persónurin at standa á odda fyri at menna LÍV framhaldandi, sigur Árni H. Ellefsen, nevndarformaður í P/F Tryggingarfelagnum LÍV.

Rune Nørregaard hevur meira enn 15 ára royndir úr fíggjar- og tryggingarvinnuni í Danmark, Føroyum og hinum Norðurlondunum. Hann er í dag bankastjóri og rakstrarstjóri (COO) í kompasbank, har ið hann saman við stovnaranum situr í stjórnini og hevur ábyrgd av eitt nú rakstri, sølu og kreditti.

Áðrenn hann fór til kompasbank, arbeiddi Rune Nørregaard í 13 ár í Føroya Banka-samtakinum. Í 12 av hesum árunum sat hann í samtaksleiðsluni sum eitt nú kredittstjóri og fíggjarstjóri. Hann hevði ábyrgd av fíggjar- og greiningarøkinum, ‘treasury’, kreditti, kt og fleiri týðandi rakstrar- og stuðulsfunktiónum.

Í sambandi við føroysku eftirlønarnýskipanina hevði Rune Nørregaard ábyrgdina av at stovna lívstryggingarfelagið NordikLív, og var hann fyrsti stjórin í felagnum. Hann hevur eisini nevndarroyndir frá tryggingarfeløgunum Trygd og Vörður og hevur áður verið góðkendur til at leiða bæði lívs- og skaðatryggingarfeløg.

Rune Nørregaard er útbúgvin løgfrøðingur, cand.jur., frá Aarhus Universiteti og hevur harafturat eina Global Executive MBA frá IE Business School. Hann hevur eisini tikið nevndarútbúgvingina fyri nevndarlimir í tryggingar- og eftirlønarfeløgum á Forsikringsakademiet. Umframt tað hevur hann arbeitt sum senior legal advisor hjá Danske Bank og sum advokatur hjá Bech-Bruun.

– LÍV umsitur ein stóran part av eftirlønaruppsparingini hjá føroyska arbeiðsmarknaðinum og hevur tí eina serliga ábyrgd mótvegis kundum, eigarum og føroyska samfelagnum. Eg gleði meg til at verða partur av LÍV og – saman við nevndini, leiðsluni og starvsfólkunum – at styrkja raksturin og byggja eitt enn sterkari og meira framtíðartryggjað felag. Hetta er ein uppgáva, sum eg fari undir við virðing, ábyrgdarkenslu og eldhuga, sigur Rune Nørregaard.

Meira fæst at vita á:

+298 530724 Árni H. Ellefsen

+45 54303357 Rune Nørregaard

LÍV hevur fingið boð frá Tryggingareftirlitinum í sambandi við, at tryggingar eru fluttar frá NordikLív til LÍV. Flytingin er liður í samstarvinum millum LÍV og Føroya Banka um persónstryggingar.

Tryggingareftirlitið vísir á, at ávís viðurskifti í sambandi við flytingina áttu at verið handfarin øðrvísi, og at kundarnir áttu at havt fingið greiðari kunning.

Endamálið hjá LÍV og NordikLív hevur frá byrjan verið, at kundarnir ikki skuldu verða verri stillaðir orsakað av flytingini. Tí eru treytir, sum NordikLív hevði, men sum LÍV ikki hevði frammanundan, settar í verk hjá LÍV. Samstundis eru treytirnar fyri Ávísar hættisligar sjúkur dagførdar og betraðar. Tað merkir, at allir kundar hjá LÍV, sum hava hesa trygging, nú hava fingið víðkaðan ella betri dekning á fleiri økjum.

Hesir kundar hava longu fingið kunning um munirnar millum treytirnar hjá LÍV og NordikLív. Lívrentukundarnir fáa í komandi vikunum serstaka kunning um tey viðurskifti, sum Tryggingareftirlitið hevur víst á.

LÍV tekur boðini til eftirtektar og tekur undir við, at tað hevur týdning, at kundar fáa greiða kunning í sambandi við broytingar í teirra tryggingarviðurskiftum.

Ert tú kundi hjá LÍV og hevur spurningar um tíni tryggingarviðurskifti, ert tú altíð vælkomin at seta teg í samband við okkum.

Í dag byrjaðu Rúnar Dam og Jógvan K. Gullfoss sum tryggingarnæmingar á LÍV.

Jógvan hevur verið ein partur av LÍV eina tíð, men í dag byrjaði hann sína leið sum tryggingarnæmingur.

Hjartaliga vælkomnir, Rúnar og Jógvan!

Vit gleða okkum til tvey spennandi, lærurík og mennandi ár saman við tykkum

1. september 2026 koma nýggjar tryggingartreytir í gildið fyri ávísar hættisligar sjúkur.

Kundar í Føroya Banka og LÍV, sum eru fevnd av hesi trygging, fáa bræv sendandi við kunning um broytingarnar.

Nýggju tryggingartreytirnar eru at finna her.

Hvat er hent í juli?
Juli var øgiliga ófriðarligur á altjóða partabrævamarknaðinum, men tá ið samanum kom, endaði
hann við einum minusi upp á 0,6%, so ársavkastið var framvegis 13,7%.

Fyrst í august vóru nýggjar hækkingar og nýggj met á fleiri partabrævamarknaðum. Stóra
afturgongdin í teimum partabrøvunum, serliga innan fyri vitlíki og tøkni, sum høvdu staðið seg
væl undanfarnu mánaðirnar, varð í juli næstan uppvigað av framgongd í nógvum av teimum
partabrøvunum, sum higartil høvdu staðið seg verri á marknaðinum. Harvið helt breiði
partabrævavøksturin frá juni fram, har fleiri partabrøv vuksu, og tað er eitt gott tekin.

Donsk partabrøv vuksu 1,3% í juli, men hava síðani hesa tíðina í fjør bert kastað 3% av sær –
serliga orsakað av afturgongdini hjá Novo og DSV.

Oljuprísurin sveiggjaði øgiliga nógv í juli, men fyri tað mesta vaks hann og var 20% hægri í juli.
Hann er vaksin eitt vet meira fyrst í august. Renturnar fóru eisini upp, eins og rentukurvan
gjørdist brattari. Tað vil siga, at munurin millum stuttfreistaðu og longfreistaðu renturnar vaks,
og tí høvdu serliga longfreistaðu lánsbrøvini negativt avkast síðst í juli, meðan vinnulánsbrøvini
við størri váða, tey sokallaðu high yield-lánsbrøvini, endaðu á null. Seinasta árið hava ymsu
lánsbrøvini havt eitt avkast nær við null.

Hví? Ófriður í Iran, sveiggj, góðir roknskapir og massiv spekulatión
Ófriðurin á partabrævamarknaðinum og hægri renturnar í juli standast serliga av, at stríðið
millum USA/Ísrael og Iran kyknaði uppaftur fyri síðani at hæsa nakað av aftur. Harvið fingu vit
fyrst høgar oljuprísir og rentur og lægri rentukursir og seinni tað øvugta. Stór spekulatión bæði í
USA og Asia í sera váðilig, sokallað gearað partabrøv elvdi til stór kurssveiggj á
partabrævamarknaðinum.

Nógvar børsskrásettar fyritøkur høvdu sum heild góðar roknskapir í øðrum ársfjórðingi, og
saman við framgongd í heimsbúskapinum gera teir sítt til, at methøga stigið á
partabrævamarknaðinum stendur við og enntá kann hækka restina av árinum.

Hægri rávøruprísir skapa hinvegin nakað av óvissu um, hvussu inflatiónin fer at vera í heyst, og
hvussu nógv miðbankarnir fara at hækka renturnar, um tær yvirhøvur skulu hækkast. Stóri
tørvurin hjá statum við stórum undirskoti og tøknigeirum við stórum íløgum í vitlíki á at útskriva
lánsbrøv fyri at læna pengar leggur trýst á renturnar bæði altjóða og í Norðurlondum.

Kríggið í Iran kann framvegis ávirka marknaðirnar
Innan fyri næstu vikurnar og mánaðirnar er gongdin í krígnum í Iran saman við vaksandi
rentunum helst størsti vandatátturin á partabrævamarknaðinum. Beint nú tosa geopolitiskir
serfrøðingar úr t.d. kapitalgrunninum Carlyle Group um tríggjar støður:

1. USA minkar um virksemið og tekur herfólk úr Persiska flógvanum og letur onnur lond um
   at sannføra Iran um at lata Hormuzsundið uppaftur. Tað hevur við sær nakað av óvissu
   og ófriði á marknaðunum og verður ikki mett sum ein sannlík støða – kanska í mesta lagi
   10%.
2. Trump forseti økir um konfliktina, setur fleiri herfólk til, kanska eisini á landi, og loypur
   harðari á Iran. Tað fer at steingja Hormuzsundið fullkomiliga, og væntast kann, at nógvir
   rávøruprísir fara upp, serliga oljuprísurin. Hetta økir um inflatiónina og skapar negativt
   avkast á bæði partabræva- og lánsbrævamarknaðunum. Carlyle Group metir hetta vera
   eina sannlíkari støðu enn ta fyrstu.
3. Hóast fram- og afturstig er ein avtala millum USA og Iran kortini mest sannlíka støðan
   (60%). Eitt slag av vápnahvíld, soleiðis at friður aftur valdar í økinum og Hormuzsundið
   letur uppaftur, fer at fáa oljuprísin at lækka alt fyri eitt og elva til framgongd á
   fíggjarmarknaðunum og kursvøkstur.

Stóra altjóða spekulatiónin, sum serliga privatir íleggjarar reka, er eisini ein vandi fyri
partabrævamarknaðirnar. Seinasta mánaðin hevur hetta elvt til methøg kurssveiggj – volatilitet –
tá ið hugt verður at einstøku partabrøvunum og ikki marknaðinum sum heild. Í grundini hava vit
ikki sæð so stór sveiggj í einstøkum partabrøvum áður sum í summar. Tað kemst av methøgum
íløgum í gearað partabrøv – serliga partabrøv á vitlíkisøkinum.

Í longdini er haldførið í stóra vøkstrinum í vitlíkisíløgum avgerandi fyri, um framgongdin í
partabrøvum heldur fram ella ikki. Ovurstóru íløgurnar í telduútgerð, dátumiðdeplar o.s.fr.
gagna í hesum tíðum fleiri vinnugreinum – ikki bara tøknigeiranum.

Samstundis er fráfaringaravtala gjørd við stjóran í LÍV-samtakinum, og tilgongdin at finna nýggjan stjóra fer í gongd

LÍV-samtakið hevur tikið avgerð um at taka seg úr fyritøkini, Globe Tracker ApS. Fyritøkan hevur ligið í fíggjarliga tungum sjógvi seinastu árini, og royndirnar at styrkja marknaðarstøðuna hava tíverri ikki eydnast nøktandi, metir LÍV-samtakið.

Globe Tracker framleiðir útgerð og mennir forrit til sporing, eftirlit og stýring av bingjum.

Tó at skipanirnar hjá Globe Tracker hava dygdir fram um aðrar líknandi skipanir á marknaðinum, hevur felagið koyrt tungt fíggjarliga og hevur havt fleiri ár við halli. Tøkniligar avbjóðingar hava ávirkað søluna og álitið hjá kundunum munandi.

LÍV-samtakið hevur nú gjørt av ikki at seta fleiri pengar í felagið.

Dagførdur íløgupolitikkur

LÍV-samtakið gjørdi fyrstu íløguna í Globe Tracker í 2013. P/F Tryggingarfelagið LÍV hevur sett tilsamans 84,9 mió. kr. í felagið, meðan upphæddin hjá P/F LÍV Lívs- og pensjónstryggingarfelag er 89 mió. kr.

LÍV-samtakið hevur dagført sín íløgupolitikk, har ásett er, at felagið ikki ger íløgur í slíkar verkætlanir, sum liggja í sama íløgubólki sum Globe Tracker. LÍV-samtakið hevur ikki aðrar líknandi íløgur.

Samlaðu íløgurnar hjá Tryggingarfelagnum LÍV eru slakar 5 mia. kr. Nú samstarvið við Globe Tracker steðgaði, var íløgan bókað til 29,9 mió. DKK, svarandi til 0,61% av samlaðu íløguognunum.

Felagið harmast vegna tryggingartakararnar um mista peningin, og at hendan íløgan ikki bar á mál.

Fráfaringaravtala

Samstundis sum avgerð er tikin um ikki at seta fleiri pengar í Globe Tracker, er fráfaringaravtala gjørd við stjóran í LÍV-samtakinum, Jan Jakobsen.

-Hesi 14 árini, Jan Jakobsen hevur verið stjóri í LÍV-samtakinum, hevur hann lagt eitt stórt arbeiði eftir seg, og vit eru sera takksom fyri hansara góða íkast. Nú er tíðin komin, at ein nýggjur stjóri førir LÍV-samtakið víðari fram á leið, sigur Árni Ellefsen, nevndarformaður í P/F Tryggingarfelagnum LÍV.

Tilgongdin at finna nýggjan stjóra fer í gongd í næstum, og starvið verður lýst leyst alment. Jan Jakobsen hevur játtað at røkja stjórasessin, til nýggjur stjóri er settur.