Category: Uncategorized @fo

Hug at gerast tryggingarnæmingur?

Starvið

Hevur tú hug at arbeiða við kundatænastu og vera við til at tryggja framtíðina hjá kundum okkara? Hevur tú somuleiðis hegni og áræði at læra? So er tað tær, vit leita eftir.

Vit sóknast eftir næmingi, ið hevur gott yvirlit og samstundis dugir at fara niður í smálutir. Tín fremsti leiklutur verður at veita eina góða tænastu, bæði umvegis telefon, teldupost og persónliga.

Umframt samskifti við kundar fert tú eisini at arbeiða við fyrisitingarligum uppgávum á deildini, sum til dømis at stovna nýggjar kundar og skráseta broytingar. Arbeiðið inniber eisini, at tú hevur lætt við at seta teg inn í nýggjar skipanir.

Á LÍV arbeiða vit støðugt við at optimera arbeiðsgongdir og at gerast meira sjálvvirkandi, og hesum verður tú eisini partur av.

Sum næmingur hjá okkum verður tú partur av kundadeildini, ið telur 13 fólk.

Tú

Tað er ein treyt, at tú hevur miðnámsútbúgving.

Vit vænta, at tær dámar væl at samstarva og samskifta, og at tú arbeiðir sjálvstøðugt. Tú trívist við bæði afturvendandi og nýggjum uppgávum. Tú setur eina æru í, at arbeiðið er væl úr hondum greitt, og ert sinnað/ur at arbeiða meira, tá nógv er at gera.

Útbúgvingin

Lærutíðin er tvey ár og byrjar 1. september 2026. Skúlagongdin er í Føroyum og er skipað í samstarv við Forsikringsakademiet. Tú kanst lesa meira um útbúgvingina og møguleikum fyri víðari lestri á www.foak.dk.

LÍV

LÍV samtakið fær árliga umleið 550 mió.kr. í inngjøldum frá fleiri enn 30.000 kundum. Á LÍV stremba vit eftir at veita kundum okkara eina dygdargóða tænastu.

Vit stremba eftir at hava væl skikkað starvsfólk, sum verða førleikament eftir tørvi. Tú kemur at starvast saman við umleið 32 eldhugaðum starvsfelagum á skrivstovu okkara á Óðinshædd 11 í Tórshavn.

Setanarviðurskifti

Tú verður lønt/ur eftir sáttmála millum LÍV og YTF.  Á LÍV er full arbeiðsvika 35 tímar, umframt hálvan tíma døgurðasteðg. Góðar persónligar tryggingar er ein partur av setanini.

Umsókn

Umsókn saman við prógvum og lívsrensli skal sendast til starv@liv.fo í seinasta lagi týsdagin 8. mai 2026.

Um tú hevur spurningar til starvið, kanst tú skriva til Sólvá Hjaltalin Olsen, kundaleiðara, á solva@liv.fo ella ringja á 231119.

Smá avkøst í januar
Altjóða partabrøv hækkaðu 1,6 % í januar. Orsøkin er, at íleggjarar fluttu pengar sínar úr
amerikonskum og tøkniligum partabrøvum og í staðin settu teir pengar í partabrøv í Emerging
Markets, í smærri feløg og í vinnugreinar so sum orku, rávørur og ídnað.
Donsk partabrøv kastaðu væl av sær triðja mánaðin á rað, men eru aftur fallin nakað fyrst í
februar, tí nakað av órógv hevur verið á altjóða partabrævamarknaðinum.
Øll lánsbrøv høvdu eisini smærri avkast í januar. Hinvegin fall dollarin nakað, samstundis sum
oljuprísurin hækkaði. Prísirnir á fleiri gimsteinum og ídnaðarmetallum hildu fram at vaksa líka
nógv, men seinastu vikurnar hava stór prísfall verið.

Hví? Góð roknskapartøl, geopolitiskur friður og fallandi inflatión
Teir fyrstu roknskapirnir úr USA, Asia og Evropa fyri fjórða ársfjórðing 2025 høvdu betri úrslit, enn
væntað, og útlitini fyri 2026 eru somuleiðis nakað betri enn væntað.
Harafturat framdi Trump enn ein sokallaðan TACO (Trump Always Chickens Out). Tað vil siga, at
hann hótti við alskyns tiltøkum í sambandi við Grønland, Danmark og handil við ES – fyri síðani
at taka hóttanirnar aftur. Hetta hevur skapt størri geopolitiskan frið. Tó fáa mongu álopini frá
Trump á sameind hjá USA alsamt fleiri altjóða íleggjarar at venda USA og amerikonskum
partabrøvum bakið.
Inflatiónin í ES og USA helt fram við at minka tvørtur um ársskiftið, sum er gott fyri bæði
lánsbræva- og partabrævamarknaðirnar.

Meiri marknaðarófriður fyrst í februar – ófriður í tøknivinnuni
Framúr góða gongdin á fíggjarmarknaðunum síðst í januar er vorðin ótryggari fyrst í februar.
Prísurin á metalli er fallin nógv – serliga á silvuri og gulli – eisini á kryptogjaldoyra og mongum
partabrøvum, serliga tøknipartabrøvum.
Tríggjar orsøkir eru til hetta:

• Ófriður í tøknivinnuni: Íleggjarar eru vorðnir ótryggir, tí tøknirisarnir gera munandi størri
  íløgur í vitlíki enn væntað. Tað sæst eisini aftur í nýggjastu roknskapunum. Eisini verður
  stúrt fyri, um vitlíkis-loysnir frameftir kunnu máa undan inntøkunum hjá softwarefeløgum.
• Ivast í amerikanska búskapinum: Vánalig arbeiðsmarknaðartøl hesa vikuna hava sátt
  iva um styrkina í amerikanska búskapinum og harvið eisini um inntøkuútlitini hjá
  fyritøkum restina av 2026.
• Sera bjartskygdir íleggjarar: Íleggjarar hava verið sera bjartskygdir, og nógvir hava tikið
  størri váða enn vanligt. Hesir íleggjarar hava verið noyddir til at lata onkur støð aftur og
  selja, og tað hevur elvt til víðari kursfall.

Eingin veit, hvussu leingi marknaðarófriðurin heldur fram, ella hvussu stór ein møgulig
afturgongd kann gerast. Afturgongdin kann eisini longu hæsa av næstu vikurnar.
Næstu vikurnar fara íleggjarar serliga at fylgja við nýggjastu vakstrar- og inflatiónstølunum í USA,
fleiri roknskapum og fráboðanum úr tøknivinnuni – og um Trump megnar at halda sær og ikki
skapa nýggjan altjóða politiskan ófrið – eitt nú í sambandi við Iran

Tað er vorðið enn og bíligari at vera kundi í LÍV.

LÍV hevur sum aðalmál, at ágóðin hjá felagnum skal koma kundunum til góðar.  
 
Felagið hevur seinnu árini bjóðað nógvum nýggjum kundum vælkomnum. Hetta ber við sær, at alt fleiri herðar eru at bera samlaðu byrðarnar.
 
Við útgangsstøði í góðu gongdini hevur felagið enn einaferð lækka umsitingarkostnaðin fyri kundarnar hjá P/F Tryggingarfelagnum LÍV, sum hava marknaðarrentuskipan. Talan er um kundar við uppsparing sum er stovnað eftir 2012.
 
Frá 1. januar 2026 lækkaði umsitingargjaldið av árliga inngjaldinum til eftirløn 10%. Umsitingarkostnaðurin av inngjaldinum lækkar úr 2,5% niður á 2,25%. Spardi umsitingarkostnaðurin verður lagdur afturat eftirlønaruppsparingini hjá kundanum, soleiðis at meira verður eftir til eftirlønina, tá ið kundin fer av arbeiðsmarknaðinum. Fasta árliga gjaldið verður óbroytt kr. 150.
 
Síðani 2016 er umsitingargjaldið av árliga inngjaldinum lækkað úr 6% niður á 2,25%, ímeðan árligi fasti kostnaðurin er lækkaður úr kr. 300 niður á kr. 150.

Vanliga lata vit øllum okkara samstarvsfeløgum eina jólagávu. Tað gera vit ikki í ár. 

Í staðin verða okkara samstarvsfelagar partur av eini størri jólagávu. – Eini jólagávu, sum fer til tey, sum hava tað eitt sindur trupult á jólum.

50.000 kr eru latnar til Barnabata. Hesin felagsskapur hjálpir barnafamiljum, sum eru fíggjarliga sperdar, og vit vóna, at okkara jólagáva lættir um og kann skapa gleði og ljós í hesi høgtíð.

LÍV Fastogn gjørt avtalu um 18 nýggjar leiguíbúðir í miðbýarøkinum í Runavík

LÍV Fastogn hevur gjørt avtalu við Sp/f Bryggjuna um at keypa byggiverkætlanina til Lon 1 í Runavík, umframt at avtala er gjørd við Sp/f Jóan Petur Vang um at byggja leiguíbúðir fyri LÍV Fastogn.

Talan er um eina sera spennandi verkætlan mitt í hjartanum í Runavík, og verða tær 18 íbúðirnar væntandi klárar at flyta inn í á sumri 2027.

LÍV samtakið arbeiðir miðvíst við at gera íløgur innan leiguíbúðarmarknaðin í Føroyum, og er avtalan um íbúðarverkætlanina í Runavík enn ein liður í hesum arbeiði.

Hetta er triðja sjálvstøðuga íbúðarverkætlanin hjá LÍV Fastogn, og við hesi verkætlan verður LÍV Fastogn eigari av 104 leiguíbúðum í Føroyum.

Hetta er eitt neyðugt stig, tí sambært Búskaparráðnum er bústaðartrotið í Føroyum vorðið ein týðandi fløskuhálsur, ið er við til at forða fyri framhaldandi fólka- og búskaparvøkstri.

Á heysti 2026 verður møguligt hjá øllum at skriva seg á bíðilista. Grundað á, at íløgurnar eru gjørdar fyri eftirlønaruppsparing hjá kundunum hjá LÍV, fáa hesir eisini framíhjárætt til íbúðirnar.

LÍV Fastogn er partur av LÍV og ger íløgur í íbúðir og aðra fastogn í Føroyum. Endamálið er at spjaða íløgurnar hjá kundunum og samstundis tryggja, at eftirlønaruppsparingin kemur kundunum og føroyska samfelagnum sum heild til góðar.

Neyvari kunning um hesa og aðrar íbúðarverkætlanir hjá LÍV Fastogn er at finna á livfastogn.fo

Í sambandi við, at nýggi skrivstovubygningurin Óðinsbrú er tikin í brúk, verður almenn móttøka í nýggju hølunum.

Móttøkan verður mánadagin 24. november 2025 kl. 15-17 í stásiligu hølunum á Óðinshædd 11, har ið høvi verður at vitja øll, sum hava leigað seg inn í bygningin.

Nýggi bygningurin er í trimum hæddum: Á niðastu hædd húsast Norðoya Sparikassi og ein kontórfelagsskapur, har ið m.a. AKF og Howden Tryggingarmekling leiga. Á miðhæddini eru Arbeiðs- og brunaeftirlitið og Heilsustýrið. Á ovastu hædd hevur Tryggingarfelagið LÍV sítt høvuðssæti.

Møguligar heilsanir kunnu sendast til Beran á kontu í Norðoya Sparikassa 9865-328-745-3.

Øll eru hjartaliga vælkomin.

Framgongd í bæði parta- og lánsbrøvum í oktober

Gongdin á partabrævamarknaðinum hevur verið góð síðani apríl, og hon helt fram í oktober við
einum avkasti upp á heili fýra prosent. Síðani hesa tíðina í fjør eru altjóða partabrøv vaksin 8,8
prosent. Hetta kemst serliga av framgongdini á partabrøvum frá nýggju marknaðunum, úr Japan
og frá vitlíkis- og tøknivirðisbrøvum – herundir teimum stóru Magnificent-7-virðisbrøvunum í
USA. Donsk partabrøv vuksu 3,5 prosent, men liggja framvegis nakað aftanfyri og eru negativ fyri
alt árið – serliga orsakað av afturgongdini í Novo-partabrævinum. Ikki-váðafúsu partabrøvini eru
eisini sum heild nakað aftan fyri marknaðargongdina, tó ikki heilsupartabrøv, sum íleggjarar
tykjast at gerast meira áhugaðir í.

Rentufall í USA elvdi til smá positiv avkøst á lánsbrøvum í oktober – bæði á stats-, realkreditt- og
vinnulánsbrøvum. Bestu avkøstini vóru tó enn einaferð á lánsbrøvum í hárentulondum. Avkastið
í oktober er 1,9 prosent, og tað er 10,6 prosent samanborið við hesa tíðina í fjør.

Prísurin á málmi setti nýtt met í oktober, men kúvendi síðani og endaði við at falla síðst í
mánaðinum saman við kryptogjaldoyrum. Oljuprísirnir hildu seg lágar, meðan dollarin styrktiskt.

Hví? Nøktandi roknskapir, vitlíkis-ovfarakæti, handilslig vápnahvíld og vendingar

Nógvir haldgóðir roknskapir í triðja ársfjórðingi gjørdu sítt til at varðveita góðu gongdina á
partabrævamarknaðunum. Og trúgvin upp á uppgongutíðirnar í vitlíkisvinnuni varð staðfest við
uppaftur størri íløguætlanum í seinastu roknskapunum hjá amerikonsku tøkni-risunum.
Árslanga vápnahvíldin í handilskrígnum millum USA og Kina ger eisini mun rætta vegin.

Seinastu vikurnar hava stórar og nógvar lánsfíggjaðar íløgur hjá privatum íleggjarum verið
stongdar, og tað hevur skapt nakað av óvissu á partabrævamarknaðinum. Og færri positiv tekin
frá amerikanska miðbankanum hava eisini gjørt sítt. Formaðurin í miðbankanum Jerome Powell
gevur greiðar ábendingar um, at hann heldur, at íleggjararnir vænta í so nógvar rentulækkingar
frá Fed’s komandi árið.

Stongsulin í amerikanska statskassanum elvir til, at fleiri týdningarmikil búskaparlig lyklatøl,
sum kunnu siga nakað um, hvussu gongdin í USA er, koma seinni út.

Hóast óvissin er vorðin størri, trúgva tey flestu framvegis upp á eina lagaliga lending sum
makrostøðu. Tað er tann sokallað “Gull-lokk” støðan, har talan er um góða gongd við bæði
parta- og lánsbrøvum.

Íleggjararnir fara tí at halda eyga við, um vaksandi inflatión ella minkandi vøkstur fara at
oyðileggja núverandi góðu gongdina.

Bíðilistin er nú opin til íbúðirnar við Sandin í Klaksvík og á Hamrinum á Argjum.

Skráset teg á bíðilistan innan 10. oktober.
Vit kasta lut um raðfylgju millum tey, ið skriva seg á bíðilistan millum 2.-10. oktober.
Tey, sum tekna seg eftir hetta, koma á bíðilistan í somu raðfylgju, sum tey hava teknað seg.

Skráset teg á www.livfastogn.fo

• Kundar, ið hava LÍV sum sín høvuðseftirlønarveitara, hava framíhjárætt til íbúðirnar.
  Hetta merkir, at tú skalt hava fingið útgjald ella goldið eftirløn inn til LÍV í seinasta lagi frá mánaðarskiftinum nov./des. 2025.
  Gev gætur, at um hetta bert er eftirløn av einum eykaarbeiði, fært tú ikki framíhjárætt.
  
• Vilt tú hava framíhjárætt? Upplýs arbeiðsgevaranum hetta kontunummar: 9181-478.898.4.
  Ivast tú í, hvussu hetta ávirkar tínar persónstryggingar hjá verandi veitara? Vend tær til LÍV á 31 11 11, og vit hjálpa tær.
  

LÍV Fastogn, sum er partur av LÍV, er farið undir tvær bústaðarverkætlanir: onnur á Hamrinum á Argjum og hin við Sandin í Klaksvík. Kunningarfundir um bygningarnar eru settir á skrá í næstu viku.

Talan er um nútímans leiguíbúðir, ið verða ætlaðar kundum hjá LÍV. Íbúðirnar verða klárar á sumri næsta ár. Allir kundar kunnu tekna seg til eina íbúð, men tað verður gjørt vart við, at eftirlønarkundar hjá LÍV, sum hava goldið inn regluliga ella nú fáa eftirløn útgoldna, hava framíhjárætt.

Endamálið hjá LÍV Fastogn er at spjaða íløgurnar hjá kundunum og samstundis tryggja, at eftirlønaruppsparingin kemur kundunum og samfelagnum yvirhøvur til góðar.

Lýsing av bústaðarverkætlanunum

• Hamarin á Argjum: Tríggir bygningar í fýra hæddum við í alt 33 íbúðum. Íbúðirnar eru millum 105 og 120 brutto m² við ymiskum rúmmøguleikum. Harumframt verður eitt felagshøli til íbúgvarnar.
• Við Sandin í Klaksvík: Ein bygningur í fýra og fimm hæddum við í alt 3.041 m² býtt upp í íbúðir á 56 til 105 brutto m².

Kunnandi tiltøk

LÍV Fastogn býður øllum áhugaðum, sum vilja frætta nærri um bústaðarverkætlanirnar, á kunningarfund í viku 40:

• 2. oktober kl. 18-19
  Kunningarfundur um bygningin Við Sandin í Klaksvík verður í Varpinum. 
• 3. oktober kl. 18-19
  Kunningarfundur um bygningin á Hamrinum á Argjum verður í Hotel Hilton í Havn.

Tilmelding krevst fyri at koma á kunningarfund.
Sí meira á heimasíðuni www.livfastogn.fo

Kom við á okkara seinastu Mentanarnátt, í næstum flyta vit í nýtt høvuðssæti á Óðinshædd.
Vit takka fyri okkum í Kopargøtu 1 við einum brakið. 

Kl. 16:30 LÍV-garðurin letur upp, opið er til kl. 21:00

Á skránni eru tiltøk til børn og barnsligar sálir, eisini verður livandi tónleikur og undirhald. 

Skráin fyri mentanarnáttina 2025:

Í LÍV-garðinum verður m.a. rørsluveiða, fiskibrunnur, gullgrevstur og vindmyllur til børnini. Ábit verður frá 17:00-19:00 ella so leingi, tað røkkur.

17:00 Klovnurin BUBU

18:00 Gudny Rasmussen

19:00 Marius Ziska

20:00 SAKARIS

21:00 LÍV-garðurin letur aftur.

Vinnararnir av rørsluveiðuni verða kunngjørdir á sosialu miðlunum.

Tiltakið er úti, tískil eru øll vælkomin oman at hugna sær úti saman við okkum í LÍV-garðinum!
Síggjast vit?